Новости на коми-пермяцком

 

Коми-пермяцкöй этнокультурнöй центрлöн "Рома йöрнöс да мича дубас" нима проект лоис вермисьöн «Лучшие из лучших» нима конкурсын. Эта  конкурсын примитісö участиесö «Культурная мозаика малых городов и сёл 2014 года» нима всероссийскöй проектлöн вермиссез.

"Рома йöрнöс да мича дубас" видзö ас пытшкын уна быдкодь мероприятиеэз. Сідз проект пырйöт чулöтчасö – коми-пермяцкöй костюмын набойка да орнамент сьöрті научнöй исследованнеэз, челядь понда велöтчан программа, ткачество да набойка сьöрті ыджыттэзöс велöтöм, округись да мöдік регионнэзісь предпринимателескöт форум, «Льняные истории» нима выставка-конкурс да Фестиваль «Лён вежалун».

Быдöс удж пöмалöм бöрті петас буклет да документальнöй фильм.

 

Июнь мöдік лунö волі керöм медодза оськöв эта проектлöн реализация понда. Куимöт гимназиялöн велöтчиссез кутчисисö тöдсасьны «севернöй шелкöт» - сідз шуöны отирас басöк, ассяма да зэв колана лён.

Медперво Кудымкарскöй государственнöй сортовöй участоклöн юралісь Караваева Галина Павловна висьтасис лёнлöн быдкодь сорттэз йылісь да кыдз колö сійö вöдитны, мед шогмис бурöн. Сэсся челядьлö мыччалісö, кыдз кöркö кöдзисö, мый эта понда видзисö кöзяйствоын куддэз.

Одзлань пондіс пизьны удж. Челядь ыджыт интересöн, югъялан синнэзöн кутчисисö кöдзны эта диво быдмасö. Быд велöтчисьлöн вöлі аслас гряд, медбы одзлань нія вермисö дозирайтны да видзöтны кыдз быдмö лёныс.

"Рома йöрнöс да мича дубас" проектлöн рамкаэз пытшкын челядькöт челöтасö не öтік мероприятие. Нія вермасö видзöтны фильм «Это диво-растение лён», пыравны музейö, кытöн öктöмöсь быдкодь торрез, кöдна колöны лёнкöт уджын да дöра кыйöмын. Тöдасö кытшöм уджын колö лён и асьныс керасö лёновöй матег, акань-обереггез да уна мöдіксö.

 

                                                       

                                  

19.03.2015
19.03.2015

     

Кольöм годö Коми-Пермяцкöй этнокультунöй центрісь редакционно-издательскöй отделісь специалисттэз лöсьöтісö коми-пермяцкöй гижиссезлöн бöрйöм произведеэзöн нель книга. Кöдна пырасö «Коми-пермяцкöй классика» серияö. Эта серия пытшкын лоасö коми-пермяцкöй гижиссезлöн, Россияись писателлез союзлöн членнэзлöн, произведеннёэз. Быд авторлöн петас торья книга, кöдаö пырасö бöрйöм уджжез.

Эттшöм идея петіс Коми-Пермяцкöй делоэз сьöрті Министерстволöн. Проект сьöрті нія вермисö адззыны сьöм дас кык (12) книга понда.

Таво петісö Андрей Зубовлöн, Михаил Лихачевлöн, Николай Поповлöн да Степан Караваевлöн медбур кывбуррез да висьттэз. Михаил Лихачевлöн пырис эшö и роч кыв вылö вуджöтöм «Менам зон» нима роман. Гижиссезлöн мукöд произведеннёэз публикуйтöмöсь первуись. Книгаэз керöмöсь öткодь обложкаöн да дизайнöн.

Виль петöм нель книгаö содтöмöсь гижиссезлöн олантуй,  критиккезлöн статьяэз, мöдік авторрезлöн касьтылöммез, фоторгафияэз.

Виль книгаэз лоасö бур отсöтöн велöтіссез да велöтчиссез понда, лоасö интереснöйöн быдыслö, кинлöн эм желаннё тöдсасьны коми-пермяцкöй литературакöт

Тираж  – 1000 экземпляр. 

 

 

Ноябрь нельöт лунö Коми-Пермяцкöй этнокультурнöй центрын чулöтчис «Это диво-растение - лен» нима фильмлöн презентация.

Фильм, кытöн висьтассьö лен быдтöм да вöдитöм йылісь, а сідз жö кыдз сійö пöртісö дöраö, вöлі керöм "От льна-долгунца до полотна" проект реализация пырйöт.

Сюжетыс лöсьöтöм отирлöн паськыт да пыдын история вылын. Кыдз быдмасісь шогмö сунис, одзлань дöра да паськöм. Быдöс этö позьö видзöтны экран вылын.

Фильм керикö ыджыт отсöт сетіс Ермакова Людмила Яковлевна да Верх-Иньва посадісь «Веселые бабульки» нима чукöр.  Нія мыччалісö лен вöдитöм да быдтöм, кудель пыркöтöм да сунис печкöм и эшö уна быдкодь удж. Кудымкарскöй государственнöй сортовöй участоклöн юралісь Караваева Галина Павловна  висьтасис ленлöн быдкодь сорттэз йылісь да кыдз колö сійö вöдитны, мед шогмис бурöн. Коми-Пермяцкöй краеведческöй музейись уджалісь Караваева Лариса Васильевна фильмын висьтасьö, кыдз рöмсьöтісö да чочкомсьöтісö дöра миян окрыгын.

Мероприятиелöн гöссезöн вöлі Пермскöй крайлöн министр Рычков Виктор Васильевич да Коми-Пермяцкöй делоэз сьöрті Министерствоись уджаліссез. Сідз жö Россомагин Владимир Николаевич, Кудымкарскöй льнозаводлöн 1981 годöдз юралісь.

Видзöтöм бöрсянь чулаліс паськыт баитöм, вöлі сетöм фильмлö оценка,  сідз жö чужис серни Коми-Пермяцкöй округын эта быдмас вöдитöм  йылісь.

«Это диво-растение - лен» нима фильм позьö видзöтны Коми-Пермяцкöй центырлöн «В Контакте» нима чукöрын.

10.11.2014
ЛЕН ВЕЖАЛУН
10.11.2014

 

«Лен вежалун» нима краевöй мероприятие чулöтчис ноябрь нельöт лунö Коми-Пермяцкöй этнокультурнöй центрын.

Пондöтчис праздникыс  «Льняные истории» нима выставка осьтöмöн. Гöссез вермисö видзöтны да донтны  Коми-Пермяцкöй округись мастеррезлісь да челядьлісь  уджжез. Быдкодь ассяма торрез, кыдз аканнез-обереггез, кушаккез да покроммез, половиккез да пызан дöра, картинаэз, вöлісö керöмöсь дзир лёнісь. Зэв бура вöрзьöтіс  отирлісь сьöлöммез важкадся паськöм. Этна торрезын  öнöдз олö дедбаббезлöн пыд история, нылöн ассямаыс да вöвлытöмыс.

Сідз жö ноябрь нельöт лунö оссис Музей, кытöн öктöмöсь быдкодь торрез, кöдна колöны лёнкöт уджын да дöра кыйöмын. Верх-Иньва посадісь «Веселые бабульки» нима чукöр да Ермакова Людмила Яковлевна мыччалісö локтöммезлö, кыдз колö уджавны ленкöт.

Госсез да участниккез понда вöлісö чулöтöмöсь мастер-классэз. Кыйны ткацкöй стан вылын велöтіс Пермскöй крайись Народнöй мастер Казанцева Галина Алексеевна. Рыбьякова Людмила Вячеславовна велöтіс керны лёнісь аканнез. Пермскöй крайын Народнöй мастер Крохалева Полина Михайловна велöтіс отирсö керны мöдöтчан обереггез.  

Пöмаліс вежалунсö бытшöм концерт, кытöн сьылісö-йöктісö миян карись да округись челядь. Быдöссö мероприятие вылö вовлісö куимсёся унажык  морт.

Чулöтны вежалунсö отсаліс «От льна-долгунца до полотна» проект, кöда лоис вермисьöн «Культурна мозаика малых городов и сел» нима медодза Всероссийскöй конкурсын. Чулöтö сійö Елена да Геннадий Тимченкоэзлöн Благотворительнöй фонд, Российскöй Федерацияись культура сьöрті Министерство да культураись  менеджеррез Ассоциациялöн оперативнöй управленнё.

 

 

20.10.2014
ГАЖА РЫТ
20.10.2014

 

Коми-Пермяцкöй этнокультурнöй центрын чулöтчис финно-угорскöй отирлöн традиционнöй культураэз сьöрті паськыт «Гажа рыт».
Мыччавны асланыс отирлісь обряддэз, сьывны-йöктыны, дорйыны национальнöй кухнялісь ассямасö öксьылісö Удмуртияись, Марий Эл-iсь, Ханты-Мансийскöй да Коми-Пермяцкöй округгезiсь коллективвез. 
Коми-пермяцкöй отирлісь культура бытшöма мыччалісö профессиональнöй ансамбль «Шондібан» да фольклорнöй коллективвез: Верх-Иньва посадісь «Веселые бабульки», Вагановаись «Югöрок», Ыджыт Кочаись этнографическöй музейись уджалiссез да челядь, Пешнигортісь ансамбль «Бичирок» да Николай Кольчурин, ассяма сьылісь. Гöссез ыджыт интересöн видзöтісö сценка «Кыдз Чань Валя да Роч Нюра конгресс вылö лöсьöтчисö», кöдö мыччаліс «Югöр» нима чукöр, орсiсö коми-пермяцкöй орсаннэзöн . Уна кин юис ва, кöдö Василий Гагарин лэдзис из пырйöт. Рыт вылын позис видзöтны удмурттэзлiсь «Гöссезöс корöм» обряд, «Сплав леса» марийскöй обряд, манси отирлiсь орсаннэз.
Рытыс и быль шогмис гажа: эд пызаннэз вöлісö тыраöсь быдкодь чöскыт сеяннэзöн да юаннэзöн, кöднö вайöмась сьöраныс гöссез да пуöмась-пöжалöмась Белоева сельпоись уджалiссез. 
Гажа рыт эшö öтпыр осьтiс виль тöдсасьöммез да мыччалiс финно-угорскöй отир коласiсь йитöттэз.

 

«В гостях у Сизимка», сiдз шусис творческöй акция, кöда чулалiс сентябрь 30 лунö Юсьвинскöй шöрöт школаын.

Акция могöн вöлiтöдсöтны челядьсö «Сизимок» нима журналлöн виль номеркöт, кöда петö коми-пермяцкöй да роч кыввез вылын Коми-Пермяцкöй этнокультурнöй центрын.

Интерактивнöй площадкаэз вылын челядь велöтчисö керны журналлiсь макет, «Юный художник» нима площадка вылын вермисö петкöтны ассиныс идеяэз бумага вылö, тöдсасисö коми-пермяцкöй эпослöн геройезкöт, орсiсö быдкодь орсаннэзöн.

Быдöссö мероприятие вылö вовлiсö 124 велöтчись. Челядь тöдiсö уна вильсö коми-пермяцкöй культура, кыв да традицияэз йылiсь. 

«Силькан» нима челядь понда творческöй фестиваль чулöтчас октябрь 11 лунö Кудымкарись ГКБУК «Коми-Пермяцкöй этнокультурнöй центрын». Фестиваль чулöтчö, медбы зорöтны челядь да томпöлöс коласын финно-угорскöй кыввез да культура дынö радейтöм. Козьналöм сiя Россияын культура годлö да Коми-Пермяцкöй округлöн öкмысдасöт (90) юбилей кежö.

Фестиваль вылын ассиныс кужöммез мыччаласö финно-угорскöй регионнэзiсь да Коми-Пермяцкöй округись öкмысдас куим (93) морт. Творческöй коллективвез да солисттэз сьыласö коми, коми-пермяцкöй, удмуртскöй, марийскöй да ханты кыввез вылын.

Фестиваль коста чулöтчас сьылiссезöс жюриöн кывзöм да донтöм, гала-концерт да вермиссесö ошкöм-козьнасьöм.

Мероприятиесö помалас «Гажа рыт», кытöн сьыласö-йöктасö «Мича асыв» (с.Большая Коча), «Веселые бабульки» (с.Верх-Иньва) нима фольклорнöй чукöррез да финно-угорскöй регионнэзiсь гöссез.

Фестиваль лöсьöтiсьöн лоö Пермскöй крайись Коми-Пермяцкöй округлöн удж сьöртi Министерство, чулöтö ГКБУК «Коми-Пермяцкöй этнокультурнöй центр». Сьöмсö вежалун чулöтöм понда сетiс Пермскöй крайись губернаторлöн Администрация «Реализация государственной национальной политики в Пермском крае» подпрограмма сьöртi.